एकीकृत नेकपा माओवादीको शनिवारदेखि हेटौंडामा हुने महाधिवेशनलाई विपक्षी दलले पनि सहयोग गर्ने

एकीकृत नेकपा माओवादीको शनिवारदेखि हेटौंडामा हुने महाधिवेशनलाई विपक्षी दलले पनि सहयोग गर्ने भएका छन् । सरकारविरुद्ध संयुक्त आन्दोलन परिचालन समिति गठन गरेर प्रदर्शन गर्दै आइरहेका दलहरुले महाधिवेशनमा भने सघाउने भएका हुन् । महाधिवेशनका लागि मकवानपुरका नेकपा एमाले, नेपाली कांग्रेस, नेकपा माले, राष्ट्रिय जनमोर्चा र राष्ट्रिय प्रजातन्त्र पार्टीले सहयोग गर्ने बताएका छन् । मकवानपुरमा नै महाधिवेशन हुन लागेको सहयोग गर्न लागिएको बताउँदै कांग्रेस मकवानपुरका सभापति रघुरमण न्यौपानेले भन्नुभयो ‘सरकाविरुद्धको आन्दोलन अलग कुरा हो, महाधिवेशनमा अवरोध हुँदैन । सहयोगै हुन्छ, ढुक्क हुनुहोस् ।’ यस्तै    नेकपा एमालेले पनि महाधिवेशनमा सहयोग गर्ने प्रतिबद्धता जनाएको छ । माओबादीको राजनीतिक कार्यक्रमलाई सहयोग गर्ने प्रतिबद्धता पनि एमालेले जनाएको छ । एमाले मकवानपुरका अध्यक्ष रामेश्वर रानाले माओबादीको कार्यक्रममा अबरोध नगरी सहयोग गर्ने बताउनुभयो । राजनीतिक गतिविधिमा अवरोध नगर्ने भन्दै एमालेले आन्दोलन पार्टीविरुद्ध नभई सरकारविरुद्ध भएको प्रष्ट पारेको छ ।

Labels: Letest news, मुख्य समाचार, समाचार