दुई महिनासम्म उतारचढाव रहेको सुनको भाऊले बुधबार फेरि नयाँ रेकर्ड कायम गरेको छ । नेपाल सुनचाँदी व्यवसायी संघका अनुसार। मंगलबारको तुलनामा साढे ३ सय रुपैंयाँले बढेर सुनको भाउ  बुधबार तोलाको ५८ हजार ५० रुपैंया पुगेको हो। यसले गएको असार ७ गते नेपाली बजारमा कायम भएको ५७ हजार ७ सय रुपैंया तोलाको रेकर्ड तोडेको छ।
 अन्तर्राष्ट्रिय बजारमा भएको मूल्यवृद्धिसँगै नेपाली बजारमा माग बढेपछि भाउ आकासिएको हो। अहिले अन्तर्राष्ट्रिय बजारमै भाऊ बढेकोले त्यसको असर नेपाली बजारमा पनि परेको संघले जनाएको छ । संघका अध्यक्ष तेजरत्न शाक्यका अनुसार सात वर्षदेखि अन्तर्राष्ट्रिय बजार बढिरहेको छ । सुरक्षित लगानी क्षेत्र मानिने सुनमा माग बढेपछि स्वतः भाउ बढ्छ । पेट्रोलियम पदार्थमा भएको मूल्यबृद्धिले पनि सुनको भाउलाई असर गर्छ । किनकी तेलको भाऊ बढ्दा सुन उत्पादनको लागत बढ्छ ।

राष्ट्रिय जनशक्ति पार्टीका अध्यक्ष सूर्यबहादुर थापाले छिट्टै दलहरूबीच सहमति बन्न नसके मुलुकको राजनीतिमा भयङ्कर विष्फोट हुने चेतावनी दिनुभएको छ । सहमतिका लागि दबाब दिन रिपोर्टर्स क्लब नेपालले सुरु गरेको दबाब अभियान अन्तर्गत आज अध्यक्ष ऋषि धमलाको नेतृत्वमा गएको पत्रकारहरुको टोलीसँगको कुराकानीमा थापाले लामो समयसम्म मुलुक यथास्थितिमा रहनै नसक्ने ठोकुवा गर्दै सकेसम्म दलहरूले छिटो सहमति गर्नुपर्ने बताउनुभयो । उहाँले गतिरोध अन्त्यमा राष्ट्रपतिको भूमिका परिस्थितिले टुङगो लगाउने भन्दै राष्ट्रपति चुप लागेर बस्ने अवस्था नरहेको धारणा बताउनुभयो । नेताहरुले व्यक्तिगत र दलगत स्वार्थलाई अगाडि राखेर सहमति खोजेकोले सहमति कायम हुन नसकेको भन्दै केही समयका लागि राष्ट्रिय स्वार्थलाई मात्र अगाडि राख्ने हो भने मुलुकले निकास पाउने उहाँको ठोकुवा छ । सहमतिको कुनै पनि विकल्प नरहेको बताउँदै थापाले अहिलेसम्म सहमतिको बाधक नेताहरु नै भएको आरोप लगाउनुभयो ।