भारतले आज आफ्नो ६४ औं गणतन्त्र दिवस मनाउँदै छ । नयाँ दिल्लीको राजपथमा गणतन्त्र दिवसका अवसरमा विशेष समारोहको आयोजना हुँदैछ । विशेष समारोहमा राष्ट्रपति प्रणव मुखर्जीले भारतको झन्डा फहराउनु हुनेछ  । यसैगरी विशेष परेडको कार्यक्रम पनि आयोजना हुँदैछ । परेडमा भारतको सैन्य क्षमता र अरू सांस्कृतिक विविधता प्रस्तुत गरिने कार्यक्रम छ । विशेष परेड समारोहमा भुटानका राजा जिग्मे खेसर नामग्याल वाङचुक प्रमुख अतिथिको रूपमा सहभागी हुनु हुने छ ।
गणतन्त्र दिवसका लागि भारतको राजधानी नयाँ दिल्लीसहित मुख्य सहरहरूको सुरक्षा व्यवस्था कडा पारिएको छ । नयाँ दिल्लीमा मात्रै २५ हजार सुरक्षाकर्मी परिचालन गरिएको भारतीय सन्चार माध्यमहरूले जनाएका छन् । सुरक्षा व्यवस्था प्रभावकारी बनाउनका लागि समारोहस्थल आसपासमा एकसय ५० सीसीटीभी क्यामरा राखिएका छन् । २६ जनवरीकै दिन भारतमा संविधान जारी भएको थियो । सार्वभौमसत्तासम्पन्न, धर्मनिरपेक्ष, समाजवादी लोकतान्त्रिक गणतन्त्र स्थापना भएको दिनलाई भारतलाई गणतन्त्र दिवसको रूपमा मनाउँदै आएको छ ।

आजदेखि स्वस्थानी व्रत सुरु भएको छ । आजैदेखि माघ स्नान गर्ने र अधिकांश हिन्दू नेपालीका घरमा सात्विक भावले श्रद्धभक्तिपूर्वक श्री स्वस्थानी परमेश्वरीको पूजा आरधना गरी स्वस्थानी कथा सुन्ने र सुनाउने गरिन्छ । स्वस्थानी व्रतकथा सत्ययुगमा हिमालयकी पुत्री पार्वतीले महादेव स्वामी पाऊँ भनी बालुवाको शिवलिङ्ग बनाई निराहार रहेर तपस्या गरी मनोकाङ्क्षा पूर्ण भएको कथासँग जोडिएको छ । शिव पार्वतीको विवाह भइसकेपछि लोकल्याणका निम्ति परम्परागत रूपमा व्रतवकथा प्रचलित हुँदै आएको मानिन्छ । सुख, सन्तोष उन्नति तथा परामार्थमा शिवलोक पाउने कामनाका साथ जगदीश्वर महादेवको स्तुति एवम् भक्तिपूर्वक पौष शुक्ल पूर्णिमादेखि सुरु गरिने श्री स्वस्थानी परमेश्वरीको व्रत, पूजन, तथा कथा श्रवण गर्ने क्रम माघ शुक्ल पूर्णिमासम्म एक महिना जारी रहन्छ ।