भारतले आज आफ्नो ६४ औं गणतन्त्र दिवस मनाउँदै

भारतले आज आफ्नो ६४ औं गणतन्त्र दिवस मनाउँदै छ । नयाँ दिल्लीको राजपथमा गणतन्त्र दिवसका अवसरमा विशेष समारोहको आयोजना हुँदैछ । विशेष समारोहमा राष्ट्रपति प्रणव मुखर्जीले भारतको झन्डा फहराउनु हुनेछ  । यसैगरी विशेष परेडको कार्यक्रम पनि आयोजना हुँदैछ । परेडमा भारतको सैन्य क्षमता र अरू सांस्कृतिक विविधता प्रस्तुत गरिने कार्यक्रम छ । विशेष परेड समारोहमा भुटानका राजा जिग्मे खेसर नामग्याल वाङचुक प्रमुख अतिथिको रूपमा सहभागी हुनु हुने छ ।
गणतन्त्र दिवसका लागि भारतको राजधानी नयाँ दिल्लीसहित मुख्य सहरहरूको सुरक्षा व्यवस्था कडा पारिएको छ । नयाँ दिल्लीमा मात्रै २५ हजार सुरक्षाकर्मी परिचालन गरिएको भारतीय सन्चार माध्यमहरूले जनाएका छन् । सुरक्षा व्यवस्था प्रभावकारी बनाउनका लागि समारोहस्थल आसपासमा एकसय ५० सीसीटीभी क्यामरा राखिएका छन् । २६ जनवरीकै दिन भारतमा संविधान जारी भएको थियो । सार्वभौमसत्तासम्पन्न, धर्मनिरपेक्ष, समाजवादी लोकतान्त्रिक गणतन्त्र स्थापना भएको दिनलाई भारतलाई गणतन्त्र दिवसको रूपमा मनाउँदै आएको छ ।

Labels: Letest news, अन्तराष्ट्रिय समाचार