‘यो यसवर्षको मात्रै नभएर झण्डै ६ वर्षयताको सबैभन्दा उच्च तापक्रम हो’ महाशाखाका मौसमबिद् बरुण पौडेलले भन्नुभयो । काठमाडौंमा तापक्रमले ३६ डिग्री नाघेको रेकर्ड पनि छ । ‘सन् १९८९ मा काठमाडौंको तापक्रम ३६ दशमलव ६ डिग्री सेल्सियस पुगेको थियो’ महाशाखाका बरिष्ठ मौसमविद् मणिरत्न शाक्यले भन्नुभयो -’तापक्रमले नयाँ रेकर्ड नै चाहिं राखेको होइन, तर पछिल्ला केही वर्षको तुलनामा चाहिं बढेको हो ।’

राजधानी बाहिर पनि तापक्रम बढेको छ । सबैभन्दा बढी गर्मी हुने धनगढी र नेपालगंजमा ४४ डिग्री सेल्सियससम्म तापक्रम पुगेको छ । ‘यस वर्ष मनसुन पनि शुरु भैनसकेको र पि्रमनसुनमा समेत राम्ररी पानी नपरेकाले गर्मी बढेको हो’ मौसमविद पौडेलले भन्नुभयो । सामान्यतया जुन १० अर्थात आइतबारदेखि मनसुन शुरु हुनुपर्ने भएपनि अझै चारपाँच दिन लाग्ने अनुमान छ ।