संविधानसभा विघटन गर्नु षड्यन्त्रमूलक रहेको साना दलहरूको निष्कर्ष

                 साना दलहरूले निर्वाचनका लागि आवश्यक संवैधानिक व्यवस्थासमेत नगरी संविधानसभा विघटन गर्नु षड्यन्त्रमूलक रहेको निष्कर्ष निकालेका छन् ।
नेकपा (माले) को पोलिटब्युरो बैठकले प्रधानमन्त्री बाबुराम भट्टराई नेतृत्वको काम चलाउ सरकार हटाई अविलम्ब राष्ट्रिय सरकार गठनको माग गरेको छ । 'राजनीतिक सहमतिबिना गैरसंवैधानिक, षड्यन्त्रमूलक र स्वैच्छाचारी ढंगले काम गर्ने सरकार देशका ज्वलन्त समस्यालाई समाधान गर्न अयोग्य र अक्षम भएको छ,' बैठकपछि विज्ञप्ति जारी गर्दै महासचिव सीपी मैनालीले भनेका छन्, 'यस्तो सरकार हटाई राजनीतिक सहमतिका आधारमा अविलम्ब राष्ट्रिय सरकार गठन गर्नुपर्छ ।'
नेकपा (संयुक्त-माक्सवादी) ले बहकाउ र उक्साहटको सिकार हुनबाट जोगिँदै जालझेल र षड्यन्त्रका राजनीतिविरुद्ध खडा हुन जनतासँग आह्वान गरेको छ । पार्टी अध्यक्ष लोकनारायण सुवेदीले विज्ञप्ति जारी गरी नयाँ निर्वाचनको घोषणालाई 'ग्रान्ड डिजाइन' अन्तर्गतको षड्यन्त्र भएको टिप्पणी गरेका छन् ।
राप्रपा नेपालले संविधानसभाबाट नयाँ संविधान निर्माण गर्ने आम नेपालीको चाहनालाई माओवादी, कांग्रेस, एमाले र मधेसी मोर्चाले कुठाराघात गरेको आरोप लगाएको छ । मुलुक संविधानसभा निर्वाचनपूर्वको अवस्थामा पुगेको उल्लेख गर्दै अध्यक्ष कमल थापाले १२ बुँदे समझदारीको मार्गचित्र असफल भएको दाबी गरेका छन् ।
राप्रपा नेपाल ताजा जनादेशको पक्षमा रहेको तर सबै राजनीतिक दलहरूबीच राजनीतिक सहमति र गृहकार्य नगरी एकपक्षीय रूपमा गरिएको घोषणाप्रति आपत्ति जनाएको छ । भट्टराईको नेतृत्वमा रहेको सरकारको वैधानिक एवं नैतिक आधार समाप्त भइसकेको उल्लेख गर्दै थापाले स्वतन्त्र, निष्पक्ष एवं भयरहित चुनावका लागि निष्पक्ष चुनावी सरकार गठनको माग गरेका छन् ।

संविधानसभा भंग भएपछि अन्तरिम संविधान, राष्ट्रपति र मन्त्रिपरिषद्को वैधानिक अस्तित्वमाथि नै गम्भीर प्रश्न खडा भएको थापाको विश्लेषण छ । 'संवैधानिक एवं राजनीतिक निकासका निम्ति देशका सम्पूर्ण राजनीतिक शक्तिहरूका बीचमा बृहत् राजनीतिक सहमति गरिनुपर्छ,' थापाले विज्ञप्तिमा भनेका छन् ।

Labels: नेपाली