सञ्चारउद्यमी सन्तोषकुमार गुप्ताको हत्या

            वीरगन्जका सञ्चारउद्यमी सन्तोषकुमार गुप्ताको भारतको बिहारमा हत्या भएको छ ।
गुप्ता, वीरगन्ज–१० पानीटंकीस्थित बिन्दास एफएमका प्रबन्ध निर्देशक थिए । बिहारको पश्चिम चम्पारणस्थित मोतीहारी प्रखण्डको ढाकामा शुक्रबार राति अपरिचित समूहले गुप्ताको हत्या गरेको हो ।
उनको घाँटी थिचेर हत्या गरिएको मोतीहारी प्रहरीले बताएको छ । मोतीहारीका डिएसपी जेएन चौधरीका अनुसार, गुप्ताको शव मोतीहारी चिरैया सडकखण्डस्थित पेट्रोलपम्पअगाडिको सडकमा फेला परेको हो । उनको गोजीबाट बिन्दास एफएमको प्रबन्ध निर्देशक लेखिएको परिचयपत्र फेला परेको डिएसपी चौधरीले बताए ।
भारतको रक्सौल बैंकरोडका स्थानीय बासिन्दा रहेका ३६ वर्षीय गुप्ताले ०६३ सालमा जन्मका अधारमा बारा जिल्लाबाट अंगीकृत नागरिकता लिएका थिए । मोतीहारी प्रहरीले गुप्ताका हत्यामा संलग्न रहेको आशंकामा स्थानीय पिन्टु राय, माधव सिंहलगायत चारलाई नियन्त्रणमा लिएको छ ।
मोतीहारीका एसपी गणेशकुमारले गुप्ताको हत्या नै भएको बताए । घाँटी थिचेर हत्या गरेपछि हत्याराले गुप्ताको शव पेट्रोलपम्पअगाडिको सडकमा ल्याएर फ्याँकेको उनले बताए । गुप्ताको शनिबार नै मोतीहारी अस्पतालमा पोस्टमार्टम गरिएको छ । पोस्टमार्टमको रिपोर्ट पाँच दिनपछि मात्र आउने डिएसपी चौधरीले जानकारी दिए । गुप्ताको रक्सौलमा फोटो स्टुडियो छ । गुप्ता सुनको कारोबारी पनि थिए । उनले नेपाल र भारतमा सुनको पैठारी गर्दै आएको प्रहरीले बताएको छ । सुनको अवैध कारोबारकै विषयमा उनका साझेदारहरूले मोतीहारीमा बोलाएर हत्या गरेको हुन सक्ने प्रहरीको अनुमान छ ।

भारतीय प्रहरीले गुप्ताको हत्या भएको बताए पनि एफएमका अध्यक्ष आरसी यादवले हत्या नभई सडक दुर्घटनामा गुप्ताको ज्यान गएको दाबी गरेका छन् । घटनास्थल पुगेका अध्यक्ष यादवले बस चढ्न खोज्दा घिसारिएका गुप्तालाई अर्को बसले ठक्कर दिँदा उनको ज्यान गएको बताए । अध्यक्ष यादवका अनुसार गुप्ताको खुट्टा र गर्दनमा गम्भीर चोट लागेको छ ।
गुप्ताको शव अन्तिम दाहसंस्कारका लागि शनिबार साँझ रक्सौलस्थित निवासमा ल्याइएको एफएमका कर्मचारी जगदीश गुप्ताले बताए । कर्मचारी जगदीश गुप्ताका अनुसार प्रबन्ध निर्देशक गुप्ता रेडियोको विज्ञापनका लागि शुक्रबार दिउँसो मोतीहारी गएका थिए । ‘मोतीहारीबाट फर्किने क्रममा सवारी दुर्घटनामा परेर उनको मृत्यु भएको हो,’ गुप्ताले  भने । गुप्ताको निधनको शोकमा शनिबार बिहानदेखि बिन्दास एफएमको प्रसारण बन्द गरिएको छ ।
रक्सौल निवासी गुप्ता, रौतहटका यादव र पर्सा सिसियाडी बैरियाका पन्नालाल साह तेलीसँग मिलेर तीन महिना अघिदेखि बिन्दास एफएम सञ्चालनमा संलग्न थिए । तीनजना लगानीकर्तामध्ये यादव एफएमका अध्यक्ष, गुप्ता प्रबन्ध निर्देशक र साह निर्देशक हुन् ।
          आजको सौर्य दैनिकले छापेको छ |

Labels: नेपाली