कान्तिपुर अस्पताल आकस्मिक सेवा ठप्प
तीनकुनेस्थित कान्तिपुर अस्पताल प्रालिको आकस्मिक सेवा पनि आज बिहानदेखि बन्द भएको छ । नेपाल राष्ट्रिय कर्मचारी सङ्गठन कान्तिपुर अस्पताल मूल एकाइले आफ्ना विभिन्न मागलाई व्यवस्थापन पक्षबाट सम्बोधन नभएको जनाउँदै आकस्मिक सेवा पनि बन्द गराएको हो । सङ्गठनका अध्यक्ष विकास अधिकारीले अस्पतालका सम्पूर्ण अस्थायी कर्मचारीलाई स्थायी गरिनुपर्ने, व्यवस्थापन पक्षबाट एकतर्फीरुपमा कर्मचारी निष्काशन कार्य बन्द गरी निष्काशित भनिएका कर्मचारीको निष्काशन फिर्ता गरिनुपर्ने, तलबलगायतका सुविधा समयमा दिनुपर्ने माग गर्नुभयो । अस्पताल व्यवस्थापनले अस्पतालको नियमविपरीत काम गरेका छ कर्मचारीलाई निष्काशन गर्ने सूचना हालै प्रकाशन गरेको थियो । करिब १०० शैय्या क्षमताको अस्पतालको साधारण सेवा कर्मचारी आन्दोलनकै कारणबाट केही दिनदेखि बन्द हुँदै आएको छ ।
Posts
0 comments