राजधानीमा जारी वैद्यपक्षीय नेकपा-माओवादीको महाधिवेशनले जनयुद्धको जगमा जनविद्रोहमा जाने कार्यदिशा पारित गरेको छ । साथै महाधिवेशनले प्रचण्ड र बाबुरामलाई एक नम्बरको दलाल घोषणा गर्दै भण्डाफोर गर्ने निर्णयसमेत गरेको छ ।बिहीबारको बन्द सत्रले जनयुद्धको जगमा जनविद्रोहमा जाने कार्यदिशासहित अध्यक्ष मोहन बैद्य किरणको राजनीतिक प्रतिवेदन एकमतले पारित गरेको हो । ‘जनयुद्धको जगमा जनविद्रोह गर्ने कार्यदिशासहित अध्यक्षको प्रतिवेदन पारित भएको छ ।’ नेता महेन्द्र पासवानले अनलाइनखबरसँग भन्नुभयो- ‘अब जनसेना आवश्यकताअनुसार बन्ने भइहाल्यो ।’दश वर्षे जनविद्रोहले जनतामा चेतना ल्याएको भन्दै त्यसलाई संगठित गर्ने र मुख्य रुपमा राष्ट्रिय स्वानीधताको मुद्दा उठाउने माओवादीले बताएको छ । कार्यदिशाअनुसार जनसंघर्षका कार्यक्रमसहित जनविद्रोहको कार्ययोजना भने अब बन्ने नयाँ केन्द्रीय समितिले तय गर्ने नेताहरुले बताएका छन् । स्रोतका अनुसार कार्यकर्ताको चर्को दबावपछि बन्दसत्रलाई सम्बोधन गर्दै अध्यक्ष बैद्यले छिट्टै जनसेना, जनअदालतसहितका संरचना बनाउने प्रतिवद्धता जनाउनु भएको हो । अध्यक्ष बैद्यले जनसंघर्ष गर्ने भने पनि सशस्त्र कि शान्तिपूर्ण भन्नेबारे प्रष्ट प्रस्ताव नल्याएको भन्दै कार्यकर्ताहरुले जनविद्रोहको कार्यदिशा लिन नेतृत्वलाई दबाव दिएका थिए ।

क्रान्तिका लागि परिस्थिति परिपक्व भएको ठहर

महाधिवेशनमा सहभागी प्रतिनिधिहरुले उठाएका प्रश्नको जवाफ दिँदै अध्यक्ष वैद्यले जनविद्रोहका लागि लेनिनले भनेका वस्तुगत अवस्था परिपक्व भएको र आत्मगत स्थिति पनि चाँडै परिपक्व हुने संश्लेषण गर्नुभएको अर्का केन्द्रीय नेता अनिल शर्मा विरहीले अनलाइनखबरलाई बताउनुभयो । ‘लेनिनले भनेको वस्तुगत अवस्था परिपक्व छन्, आत्मगत स्थिति पनि तुरुन्तै निर्माण गर्न सक्छौं, तयारीमा जानुपर्छ ।’- वैद्यको भनाइ उधृत गर्दै शर्माले भन्नुभयो ।

तर, नेपालमा लेनिनले भनेजसरी क्रान्ति नहुने भन्दै वैद्यले जनयुद्धको जगमा मात्रै जनविद्रोह सम्भव हुने संश्लेषण गरेको शर्माले जानकारी दिनुभयो । ‘नेपालमा रुस र चीनका दुबै विशेषतालाई मिलाएर मात्रै क्रान्ति सम्भव छ । क्रान्तिकै दौरानमा विशिष्ट मोडल निर्माण हुन्छ ।’-बैद्यको संश्लेषण छ ।

प्रचण्ड र बाबुराम एक नम्बरका दलाल

नेकपा-माओवादीले आफ्ना पूर्वनेताद्धय प्रचण्ड र बाबुरामलाई एक नम्बरको दलाल भनेका छन् । नेता यादवले भन्नुभयो-’प्रचण्ड बाबुराम भारतीय विस्तारवाद र नवउपनिवेशवादको एक नम्बरका दलाल हुन्, त्यसको भण्डाफोर गछौं ।’अरुको दलाललाई प्रधानमन्त्री बनाउन आन्दोलनमा नजाने

नेकपा-माओवादीले संसदवादी शक्तिहरुले मुलुकलाई निकास दिन नसक्ने भन्दै क्रान्तिकारीको नेतृत्वमा सरकार हुनुपर्ने बताएको छ । ‘अब संसदवादी शक्तिहरुले मुलुकलाई निकास दिन सक्दैनन’ यादवले भन्नुभयो-’अब देशको जिम्मा हामी लिन्छौं र देशलाई अगाडी बढाउँछौं । त्यसका लागि क्रान्तिकारीको नेतृत्वमा सरकार हुनुपर्छ ।’ माओवादीले वामपन्थी, गणतन्त्रवादी र देशभक्त शक्तिहरुसँग मोर्चाबन्दी गरेर अघि बढ्ने बताएको छ ।

बाबुराम सरकार विरुद्ध कांग्रेस, एमालेसँग मिलेर आन्दोलनमा जाने कि नजाने भन्ने विषयमा आइतबार नेताहरुले बोलेका छन् । सोक्रममा नेताहरुले बाबुरामलाई प्रधानमन्त्रीबाट हटाएर ‘अर्को दलाल’लाई कुर्सीमा पुर्याउन आन्दोलन नगर्ने भन्दै आफ्नै नेतृत्वमा सरकार गठन हुनुपर्ने बताएका छन् । कांग्रेस, एमालेलगायतका विपक्षी दलले चाहिँ सुशीललाई प्रधानमन्त्री बनाउने शर्तमा वैद्यपक्ष आफूहरुमको मोर्चामा आउने अपेक्षा गरेको थिए ।

onlinekhabar.com