चौथौं दिनमा सुटिङ चलिरहेको फिल्म 'मञ्जरी' का चार फिल्मकर्मी अत्याधिक तापक्रमले गर्दा बिरामी हुन पुगे । शनिबार ४४ डिग्री तापक्रम भईंदिंदा सहन नसकेर बिरामी भएका फिल्मकर्मीलाई हस्पिटल नै भर्ना गर्नुपर्‍यो ।

निकै गर्मी स्थान मानिने बुटवलमा छायाँकनरत फिल्मका कलाकार सरिता भण्डारी, सहायक निर्देशक किशोर भट्ट र स्पट व्याय बिष्णु मैनाली ताप सहन नसकेपछि बेहोसै हुने गरेर बिरामी भएका हुन् । उनीहरू बिरामी भएपछि निर्माण युनिटले स्थानिय सिटी अस्पतालमा  उपचार गराएको थियो । अहिले सकुसल भई उनीहरूले   आफ्नो कामलाई निरन्तरता दिईसकेका छन् ।फिल्मको कथा नै बुटवल क्षेत्रमा घटेको यथार्थ घटना भएकाले सुटिङ सोही स्थानमा गर्नु परेकाले गर्मी सहेर भएपनि काम गर्न बाध्य भएको निर्देशक गणेश देब पाण्डेले फिल्मीखबरलाई जानकारी गराए । उनले भने, '४४/४५ डिग्री तापक्रममा सुटिङ गर्न गार्‍हो त हुन्छ नै तर पनि हामी राम्रो प्रोडक्ट निकाल्न मेहनतका साथ गरिरहेका छौं ।' बुटवल, भैरहवा र नारायणगढमा २५ दिनको सेड्यूलमा काम गरेर युनिट काठमाण्डौ फर्कने निर्देशक पाण्डेले बताए ।

यता दुई दिन काम गरेर फिल्मकी कलाकार रष्मि भट्टले युनिटलाई थाहै नदिई अर्को सुटिङमा गई दिंदा निर्माण युनिट अर्को तनावमा पर्‍यो । निर्देशक पाण्डे भन्छन्, 'उहाँले अर्को फिल्ममा पनि एग्रिमेन्ट गर्नुभएको रहेछ  त्यसैले  अर्को युनिटबाट चर्को दबाब   आएकाले उहाँ जानु भाको हो र त्यसपछि हामीले उहाँको सट्टामा कोपिला थापालाई एग्रिमेन्ट गरि काम गराईसक्यौं ।' कलाकारहरू प्रोफेस्नल नभईंदिदा फिल्मकर्मीले यस्ता दु:ख बेलाबेला बेहोर्दै आउनु परेको यथार्थता रहेको पाण्डेको भनाई छ ।टुका इन्टरटेन्मेण्टको व्यानरमा नरेश पाण्डे र महेश चालिसेले निर्माण गरिरहेको सो फिल्ममा गौरव पहाडी र सुजाता कोईराला मुख्य भुमिकामा छन् । यि दुई नयाँ अनुहारले टिनेजर केटाकेटीको प्रेमकथालाई प्रतिनिधित्व गर्दै अभिनय गरेका छन् । साथमा टिका पहाडी, बिष्णु रिजाल, सरिता भण्डारी र कोपिला थापाको मुख्य भुमिका रहनेछ । कालिप्रसाद बाँस्कोटाको संगीत र गम्भिर बिष्टको करियोग्राफी रहने सो फिल्ममा भारतबाट आएका नेपाली महेश पौडेललाई सिनेमाटोग्राफरको जिम्मा दिईएको छ । महेशलाई क्यामेरामा केहि भारतिय प्राबिधिकले साथ दिएका छन् ।