कुखुराको मासुको भाउ अहिलेसम्मकै सबैभन्दा महँगो भएको छ। काठमाडौंमा ब्रोइलर कुखुराको मासु किलोको २ सय ८० रूपैयाँ पुगेको छ। मासु व्यवसायीका अनुसार यो मूल्य अहिलेसम्मकै सबैभन्दा महँगो हो। राजधानीमा कुखुराको मासु बेच्ने ठूला कोल्डस्टोरहरुलेनै खुद्रा मूल्य किलोको दुइसय ८० रुपैयाँ तोकेका छन्। मासुका खुद्रा पसलहरुमा यो भन्दा किलोमा ५ देखि १५ रुपैयाँसम्म बढी मूल्य हुनेछ। 'जेठ, असारमा किसानले कुखुरा पाल्न छाडेको हुँदा अहिले सबैभन्दा महंगो भएको हो,' कुखुरा बिक्री व्यबसायी संघका अध्यक्ष जंगबहादुर बिसीले भने। दुई साता अघि नयाँ भाउ तोकेका मासु व्यबसायीले बुधबारदेखि लागु हुनेगरि किलोमा १५ रुपैयाँ बढाएका हुन्।  

'मागको भन्दा १५ देखि २० प्रतिशत कम सप्लाई छ,' बिसीले भने। काठमाडौंको लागि मात्र दैनिक दुईलाख ५० हजार किलो कुखुराको मासु चाहिन्छ। देशभरिको लागि साढे तीनलाख किलो मासुको माग छ। साउन पहिलो सातादेखि कुखुराको भाउ राजधानीमा बढ्न थालेको हो। यसबीचमा तीन पटक मासुको भाउ बढिसकेको छ। दुई महिना अघि कुखुराको भाउ घटेपछि कुखुरा पाल्ने व्यबसायीहरु पलायन भएकोले अहिले भाउ बढेको हो।मासुको मूल्य वृद्धिसँगै कुखुरा पाल्ने व्यबसायीले पाउने भाउ समेत अहिलेसम्मकै सबैभन्दा बढी छ। कुखुरा व्यबसायीले अब जिउँदो कुखुराको मूल्य प्रति किलो दुईसय पाँच रुपैयाँ पाउनेछन्। दुई साता अघि जिउँदो कुखुराको मूल्य किलोको एकसय ९५ रुपैयाँमात्र थियो।