लामो समययता नेपाली राष्ट्रिय फुटबल टिमले बिहीबार सर्वाधिक खराब प्रदर्शन गर्‍यो । प्यालेस्टाइनविरुद्ध बेहोरेको हारमा नेपाली खेलाडीको प्रदर्शन 'राष्ट्रिय जर्सी' को लायक थिएन । न त उनीहरूले एएफसी च्यालेन्ज कप र नेपालको प्रदर्शनलाई लिएर उत्साहित प्रशंसकहरूको भावनामा न्याय गर्न सके । प्रतियोगिताको पहिलो दिन दशरथ रंगशालामा भएको खेलमा बेहोरेको हारले नेपालको सेमिफाइनल पुग्ने समीकरण तुरुन्तै कठिन भएको छ । उता हल्चोक मैदानमा भएको खेलमा तुर्कमिनिस्तानले एक गोलले पछाडि परेको स्थिति उल्टाएर माल्दिभ्सलाई हरायो । नेपालको प्रदर्शनमा 'उत्साह, आत्मविश्वास र समर्पण' को स्पष्ट अभाव देखिन्थ्यो । त्यसको प्यालेस्टाइन टिमले पूर्ण फाइदा उठायो र खेलको दुवै छेउ एक/एक गोल गर्‍यो । खेल सुरु भएको चौथो मिनेटमै प्यालेस्टाइनले आला आतायाको गोलले अग्रता लियो । 

नेपाली डिफेन्सले सम्हालिने अवसर पनि नपाएको बेला मोहम्मद मोहम्मदले ब्याकपासमा नजिकको दूरीबाट आतायाले गोल गरे । फाहेड अटलले ६५ औं मिनेटमा दोस्रो गोल थपे । आतायाकै सटीक थ्रु-पासमा अटलले नेपाली गोलकिपर किरण लिम्बूलाई बिट गर्दै गोल गरे । सुरुआतमा नेपालले राम्रो सुरुआत लिन सकेन । 

बीचमा केही सम्हालिएर खेले पनि त्यो निर्णायक हुन सकेन । जुमनु राईले दुवै हाफमा केही अवसरहरू पाए पनि त्यसको फाइदा उठाउन सकेनन् । जुमनुले अनिल गुरुङको पासमा २६ औं मिनेटमा गरेको प्रहार पोस्टमा ठोकिएर फर्केको थियो । प्रशिक्षक ग्राहम रोबर्ट्सले नेपाली टिमको प्रदर्शन 'गैरव्यावसायिक खेलाडीहरू' जस्तो भएको बताए । 'अन्तर्राष्ट्रिय फुटबलमा साना-साना भूलहरू गर्नुहुन्न । आज नेपालले त्यस्तै गल्ती गर्‍यो र त्यसको दण्ड पायो,' रोबर्ट्सले भने । प्यालेस्टाइन प्रशिक्षक जमल मोहम्मदले टिमको जितमा खुसी व्यक्त गरे र आफ्ना खेलाडीले राम्रो प्रदर्शन गरेको दाबी गरे । उनले संयमित र अनुशासित नेपाली दर्शकको प्रशंसा पनि गरे । 

उता तुर्कमिनिस्तानले जितसँगै अंक तालिकामा सुरुआती अग्रता लिएको छ । तुर्कमिनिस्तान र प्यालेस्टाइन दुवैको समान ३-३ अंक भएको छ । नेपाल भने हारसँगै पुछारमा रह्यो । हल्चोक मैदानमा माल्दिभ्सले हसन अब्दुहमको गोलले २० औं मिनेटमा अग्रता लिएको थियो । उसले त्यसलाई कायम राख्न भने सकेन । 

तुर्कमिनिस्तानको जितमा अरस्लाम मयरत नायक रहे । उनले एक गोल गरे र अर्कोका लागि अवसर सिर्जना गरे । रुस्लान मिनगाजोभले ३३ औं मिनेटमा बराबरी गोल फर्काएयता गाहरयम बेर्डीले ७८ औं मिनेटमा दोस्रो गोल थपे । खेल सकिन पाँच मिनेट अगाडि मियरतले तेस्रो गोल पनि गरे । 

'हामीले राम्रो खेल्न सकेनौं, प्राप्त जितमा हामी खुसी छौं,' तुर्कमिनिस्तानका प्रशिक्षक याचगुलीले भने । उता माल्दिभ्सका प्रशिक्षक उस्भान उरवानीले आपmनो टिमले खासै खराब नखेलेको तर डिफेन्सको प्रदर्शन निराशाजनक रहेको बताए । 'डिफेन्सले धेरै गल्ती गर्‍यो, विशेषतः सिनियर खेलाडीको प्रदर्शन राम्रो रहेन,' उनले थपे । 

नेपाली टिमः किरण चेम्जोङ, विराज महर्जन (जितेन्द्र कार्की-७६), रोहित चन्द, सन्दीप राई, सागर थापा (कप्तान), रविन श्रेष्ठ, भरत खवास (सन्तोष साहुखल-४६), निराजन खड्का (भोला सिलवाल-४६), राजु तामाङ, अनिल गुरुङ र जुमनु राई ।