असार १ गते राजधानीमा माओवादीले जनप्रदर्शन गर्ने

              माओवादीले असार १ गते राजधानीमा जनप्रदर्शनको भब्य तयारी गर्न नेवाः र ताम्सालिङ राज्य समिति अन्तर्गत केन्द्रीय सदस्यलाई निर्देशन दिएको छ ।
शुक्रबार पार्टी केन्द्रीय कार्यालय कोटेश्वरमा केन्द्रीय सदस्यहरुको संयुक्त छलफलमा पार्टी अध्यक्ष पुष्पकमल दाहालले जनप्रदर्शनलाई व्यापक र बृहत् बनाउन  निर्देशन दिएका हुन् ।
  पार्टी उपाध्यक्ष नारायणकाजी श्रेष्ठले दिएको जानकारीअनुसार पहिचानसहितको सङघीयता, सङघीयतासहितको संविधानको लागि पार्टीले आयोजना गरेको जनप्रदर्शनको कार्यक्रमलाई व्यापक बनाउन निर्देशन दिएको बताए ।
'सङघीयता विरोधीको चलखेल बढेकाले संविधानसभाबाट संविधान बन्न नसकेको र त्यसलाई जनताको बीचमा लगेर नङग्याउने विषयमा जनताको साथमा कदम चाल्ने निर्णय भएको हो' उनको भनाइ थियो ।
उपाध्यक्ष मोहन वैद्य पक्षधरले असार १ गतेकै दिन कार्यकर्ता भेला बोलाएको सन्र्दभमा एमाओवादीकै संस्थापन पक्षले सो दिन जनप्रदर्शनको कार्यक्रम अगाडि सारेको हो । पार्टी उपाध्यक्ष एवं प्रधानमन्त्री डा. बाबुराम भट्टराईले पछिल्लो राजनीतिक घटनाक्रमबारे बताएका थिए ।

उनले पछिल्लो दिनमा पार्टी र सरकारले लिएको बाटो सही भएको भन्दै सबै नेता तथा कार्यकर्तालाई सरकारले घोषणा गरेको आगामी मङसिर ७ गतेको निर्वाचनलाई सफल बनाउन निर्देशन दिएका थिए । 'सङघीयता विरोधीको चलखेलका कारण जनपक्षीय संविधान बन्न नसकेको भन्दै उनले त्यस्ता तत्वहरुको जनस्तरबाटै नङग्याउन पार्टीले उल्लेखनीय भूमिका खेल्नुपर्ने' बताएको एक सहभागीले बताए । माओवादीको सभामा सत्तासाझेदार दलका नेताहरु पनि सहभागी जनाएको छ ।
छलफलमा नेवाः राज्य समितिअन्तर्गतका काठमाडौँ, ललितपुर, भक्तपुरका केन्द्रीय सदस्य र ताम्सालिङ राज्य समितिअन्तर्गतका ९ जिल्लाका नेता, कार्यकर्ताहरुको सहभागिता रहेको थियो ।

Labels: नेपाली