''४ वर्षपछि मूल्य ७ प्रतिशतभन्दा कम वृद्धि''
विगतमा भएको उच्च मुद्रस्फीतिले उपभोक्तामा मार्कामा परिरहेका बेला यसपालि भने चार वर्षपछि पहिलो पटक मूल्यवृद्धि ७ प्रतिशतभन्दा कम हुने देखिएको छ । यसले उपभोक्तालाई केही राहत पुग्ने छ ।
खाद्य वस्तुको मूल्यमा आएको गिरावटका कारण यो सम्भव देखिएको हो । राष्ट्र बैंकले सार्वजनिक गरेको तथ्यांक अनुसार आर्थिक वर्षको ६ महिनामा मूल्य वृद्धि ६ दशमलव ८ प्रतिशत छ ।
यसअघि २०६४ माघ अन्तिममा मूल्य वृद्धि ६ दशमलव ४ प्रतिशत थियो । यस वर्ष सरकारले मूल्य वृद्धिलाई ७ प्रतिशतमा सीमित राख्ने प्रक्षेपण गरेको छ ।
केन्द्रीय बैंकका तथ्यांकमा उपभोक्ता मुद्रास्फीतिलाई खाद्यान्नको प्रभाव कम भएको र गैरखाद्य वस्तुको बढेको देखिन्छ । यसअघि मूल्य वृद्धिमा सबैभन्दा ठूलो योगदान खाद्यान्नको महँगीले दिँदै आएको थियो ।
६ महिनामा खाद्य तथा पेय पदार्थ समूहको मूल्य सूचक ४ प्रतिशतले र गैरखाद्य तथा सेवा समूहको सूचक ९ प्रतिशतले बढेको छ । अघिल्लो वर्ष सोही समयमा यस्तो वृद्धि क्रम १७ दशमलव ६ र ६ दशमलव २ प्रतिशत थियो ।
यस वर्ष खाद्यान्न उत्पादन राम्रो भएको र भण्डारमा समेत उपलब्ध रहेकाले मूल्य घटेको राष्ट्र बैंकले जनाएको छ । 'यस वर्ष बन्द हडताल कम भएको र खाद्यान्नको उत्पादन पनि राम्रो भएकाले यो समूहको मूल्य वृद्धि कम भएर समग्रमा असर परेको हो,' राष्ट्र बैंकका एक अधिकारीले भने । यसका साथै भारतमा घटेको खाद्यान्नको मूल्यले समेत नेपालमा महँगी घटाउन सहयोग गर्ने राष्ट्र बैंक बताउँदै आएको छ ।
पेट्रोलियम पदार्थमा भएको मूल्य वृद्धिका कारण गैरखाद्य समूहमा यातायात सेवाको मूल्य बढेको छ । यो ६ महिनामा १७ दशमलव १ प्रतिशतले बढेको छ । गत वर्ष यो ११ दशमलव १ प्रतिशतले बढेको थियो ।
राष्ट्र बैंकले जारी गरेको तथ्यांकले मूल्य वृद्धि ७ प्रतिशतभन्दा कम भएको देखाए पनि केही स्वतन्त्र विश्लेषक भने यसलाई मान्न तयार छैनन् । 'पछिल्लो समय डलरमा देखिएको अस्थिरता र पेट्रोलियम पदार्थमा भएको मूल्य वृद्धिका कारण महँगी ७ प्रतिशत भन्दा कम छ भन्ने आधार छैन,' एक अर्थशास्त्रीले भने ।
अर्कोतर्फ एकै महिनामा शोधानान्तर बचत ५ अर्ब ५३ करोड रुपैयाँले बढेको छ । योसँगै मुलुकबाट बाहिरिने र भित्रिने रकमको अवस्था शोधानान्तर स्थिति हालसम्मकै उच्च बचतमा पुगेर नयाँ रेकर्ड बनाएको छ । राष्ट्र बैंकले सार्वजनिक गरेको तथ्यांक अनुसार आर्थिक वर्षको ६ महिनामा शोधानान्तर स्थिति ६६ अर्ब ७२ करोड रुपैयाँले बचतमा छ ।
यसको अर्थ मुलुकले खर्च गर्ने रकमभन्दा आय बढेको छ । पाँचौं महिनामा यस्तो बचत ६ अर्ब १९ करोड रुपैयाँ थियो ।
सेवा क्षेत्रबाट बढेको आय र रेमिट्यान्सको आप्रवाह बढेपछि शोधानान्तर स्थितिले नयाँ रेकर्ड बनाइरहेको छ । आर्थिक वर्षको ६ महिनामा रेमिट्यान्स आउने क्रम ३७ प्रतिशतले बढेर १ खर्ब ६२ अर्ब ३७ करोड रुपैयाँ पुगेको छ ।
गत वर्ष यही अवधिमा रेमिट्यान्सको वृद्धिदर ११ दशमलव ५ प्रतिशत थियो । शोधानान्तर बचत बढाउन वैदेशिक लगानीले पनि सहयोग गरेको छ । ६ महिनामा ५ अर्ब ९ करोड रुपैयाँको प्रत्यक्ष वैदेशिक लगानी मुलुक भित्रिएको छ । अर्कोतर्फ विदेशी विनिमय सञ्चिति पनि ३३ दशमलव १ प्रतिशतले बढेको छ । यो ६ महिनामा ३ खर्ब ६२ अर्ब पुगेको छ ।
- By;ekantipur.com
Posts
0 comments