म्याजिक मोमेन्ट्स तेस्रो सिमरा गोल्डकपको उपाधिका लागि लक्ष्मी हुन्डाई मनाङ-मर्स्याङ्दी क्लब, काठमाडौं र सहारा क्लब, पोखरा भिड्ने भएका छन् ।बिहीबार भएको अन्तिम सेमिफाइनलमा मनाङले रानीपोखरी कर्नर टिम (आरसीटी) काठमाडौंलाई टाइब्रेकरमा २-१ ले पराजित गरी उपाधिनजिक यात्रा पुगेको हो ।निर्धारित र अतिरिक्त समयमा पनि दुवै टिमका तर्फबाट गोल हुन नसकेपछि खेलको छिनोफानो टाइब्रेकरमा भएको हो । टाइब्रेकरमा मनाङका लागि कप्तान शिव श्रेष्ठ र कालु थापाले गोल गरेका थिए । आरसीटीका लागि एन्टोलोले मात्र गोल हाने ।  खेलको सुरुवातमा मनाङले डिबक्सनजिकै पाएको पहिलो फ्रिकिकलाई राजकुमार घिसिङले गोलमा परिणत गर्न सकेनन् । यस्तै राम थापा मगरले पोस्टनजिक पाएको बललाई कमजोर हेड गर्दा गोलकिपरले नियन्त्रणमा लिए । खेलको पहिलो हाफमा आरसीटीले पूरै दबाबमा राखे पनि पछि आपसी तालमेल मिलाएर मनाङ लयमा फर्केको थियो ।

दोस्रो हाफको मध्यतिर राजकुमारले हानेको कडा प्रहार पनि गोलकिपरले रोकेका थिए । मनाङका एमबीले लेनेल स्टेफेन र जम्बो एन्टोलेले डिफेन्समा बलियो उपस्थिति जनाएपछि आरसीटीका खेलाडीलाई गाह्रो भएको थियो । आरसीटीका डेविड मोसुगोंले पहिलो हाफमा हानेको फ्रिकिकगोलकिपरले बचाएका थिए । मनाङका डिफेन्डर एमबीले लेनेल स्टेफेनले बल फर्काउन असफल रहेपछि पोलनजिक पाएको अवसर आरसीटीका रेशम रानाले सदुपयोग गर्न सकेनन् । उनको फितलो प्रहार मनाङका गोलकिपरले सजिलै समाते ।

खेलको अतिरिक्त समयमा दुवैतर्फबाट लगातार गोलको प्रयास भए पनि त्यो सफल हुन सकेन । हारपछि आरसीटीका प्रशिक्षक बैजुनाथ कपालीले आक्रोशित हुँदै 'खेलाडीले भन्दा रेफ्रिले बढी खेलेको' हुनाले आफ्नो टिम पराजित हुन पुगेको आरोप लगाए । उनले खेलाडीबाट आफू सन्तुष्ट रहेको समेत बताए ।

मनाङका प्रशिक्षक हरिओम श्रेष्ठले खेलको सुरुवातीमा हल्का तालमेल नमिलेको बताउँदै ३/४ ओपन बल पाए पनि गोल गर्न नसकेको स्वीकारे । उनले आहा गोल्डकप जस्तै सिमरा गोल्डकप पनि मनाङकै हुने दाबी गरे । टिममा दुई फरवार्ड थपिएको हुँदा जित सहज हुने देखेर आफूले उपाधि कब्जा गर्ने दाबी गरेको श्रेष्ठले बताए । उपाधिका लागि मनाङ र सहारा शनिबार भिड्नेछन् ।

By;ekantipur.com