सेनापति प्रकरणपछि पटक पटक दिल्ली दर्शनमा जाने चाहना देखाएपनि भारतको बेवास्ताका कारण पुरा हुन नसको प्रचण्डको दिल्ली यात्रा आगामी साता सुरु हुने भएको छ ।लामो समयदेखि माओवादी र भारतको राजनीतिक नेतृत्वबीच रहेको सम्बादहीनता अन्त्य गर्न भारतकै पहलमा प्रचण्डको भ्रमण हुन लागेको स्रोतको भनाई छ । एक औपचारिक कार्यक्रमको बहानामा एमाले र कांग्रेसका नेतासमेत बोलाइए पनि मुख्य उदेश्य प्रचण्डसँगको वार्ता नै भएको स्रोतको दावी छ ।

भारत भ्रमणमा प्रचण्डले कांग्रेस नेतृ सोनिया गान्धी र प्रधानमन्त्री डा. मनमोहन सिंहसँग भेटवार्ता गर्ने लगभग निश्चीत भइसकेको छ । नेपालमा सेना समायोजनको काम अन्तिम चरणमा पुग्नै लाग्दा र संविधानका बिबादित बिषयमा दलहरुबीच निर्णायक छलफलहरु भइरहँदा प्रचण्ड र भारतीय नेतृत्वको सम्बादलाई अर्थपूर्ण मानिएको छ ।प्रचण्ड र भारतीय नेतृत्व दुवैको चाहनामा हुन लागेको यो भ्रमणका दौरान एकअर्काप्रति आश्वस्त हुने प्रयास गर्ने बताइएको छ । खासगरि भारतीय नेतृत्वले अहिलेको शान्ति प्रकृयालाई अगाडी बढाएकोमा प्रचण्डलाई हौसला दिंदै शान्ति प्रकृया टुंगाउन र संबिधान जारी गर्न प्रेरित गर्ने योजना बनाएको छ । वर्तमान सरकार ढालेर तत्कालै आफु प्रधानमन्त्री हुने चाहनामा रहेका प्रचण्डलाई अहिले नै त्यसो नगर्न सुझाउने स्रोतको दावी छ । यो महिनाको अन्त्यसम्ममा कांग्रेस र एमालेलाई पनि सरकारमा सहभागी बनाई राष्ट्रिय सहमतिको सरकार बनाउने, यही सरकारले संबिधान जारी गर्ने र त्यसपछि नेपाली कांग्रेसलाई सरकारको नेतृत्वमा गर्नेमा भारतले प्रचण्डलाई कन्भिन्स गर्ने छ । त्यसपछि बन्ने नयाँ सरकारको नेतृत्वमा प्रचण्डलाई स्थापित गराउन समेत भारतले आश्वासन दिने स्रोतको दावी छ ।

तर प्रचण्डले भने शासकीय स्वरुप र संविधानका केहीअन्तरबस्तुमा समेत भारतीय नेतृत्वको प्रतिबद्धता खोज्नेछन् । मिश्रति शासकीय स्वरुपमा प्रत्यक्ष निर्वाचित राष्ट्रपतिको स्थान आफुलाई सुरक्षित गर्नेगरि अन्य दललाई मनाउनु पर्ने उनको माग रहने छ । पछिल्लो दिनमा सहमति जुटिसकेको अबस्थामा भारतीय असहमतिकै कारण नेपाली कांग्रेस मिश्रति शासकीय स्वरुपबाट पछि हटेको प्रचण्डको बुझाई छ ।

सेनापति प्रकरण र त्यसलगत्तै पनि प्रचण्डले भारतको राजनीतिक नेतृत्वसंग सिधा सम्बाद गर्ने प्रयत्न गरेका थिए । तर, भारतीय राजनीतिक नेतृत्वले त्यति वास्ता नगरि माओवादीलाई पेल्ने नीति लिएपछि प्रचण्डले सडकबाटै भारतीय नेतृत्वसमक्ष वार्ता गर्ने प्रस्ताव गरेका थिए । प्रचण्डले करिव तीन बर्षसम्म नेपालस्थित भारतीय दूतावास र जासुसी निकायसँग मात्र सम्बाद गरेका थिए । प्रचण्ड जनबिद्रोहको लाइन छाडेर शान्ति र संबिधानको लाइनमा आएपछि माओवादी र भारतबीचको सम्बन्ध सुधार सुरु भएको थियो ।

By;ekantipur.com