अध्यक्ष पुष्पकमल दाहालको बोलीमा बिश्वास नभएको भन्दै वाइसिएलले 'लिखित रुपमा आर्थिक प्याकेज उपलब्ध गराउने प्रतिबद्धता नजनाए दाहालकै निवास घेराउ गर्ने' चेतावनी दिएका छन् । वाइसीएल नेताहरुले 'वाइसीएलका लागि भनेर लडाकुबाट एक/एक हजारका दरले तलबबाट उठाएको रकम' सार्वजनिक गर्न माग समेत गरेका छन् ।

पार्टी केन्द्रीय कार्यालय पेरिसडाँडामा शनिबार बसेको वाइसीएल केन्द्रीय समिति बैठकमा प्याकेजलाई व्यवहारमा कार्यान्वयन नगरे पार्टीभित्र देखिएका बिकृतिको भण्डाफोर गर्ने अडान व्यक्त गरेका थिए । बैठकमा उपस्थित दाहालले भने 'छिट्टै प्याकेज उपलब्ध गराउने' मौखिक प्रतिबद्धता जनाए । प्याकेज दिन ढिलाइ भएकोमा दाहालले दुःख पनि व्यक्त गरेका थिए ।

बैठकमा वाइसीएल नेताहरुले संविधानसभा, त्यसपछि पनि आफूहरुलाई 'प्रयोग गरेर फ्याकेको' उल्लेख गर्दै नेतृत्वको चर्को आलोचना गरेका थिए । 'हामीलाई संविधानसभा निर्वाचन र त्यसपछि पनि पार्टीले प्रयोग गर्दै आएको छ' घिमिरेले भने, 'हामीलाई चाहिदा भाूडो, नचाहिदा ठाडो बनाइयो । अब धैर्य गर्न सकिन्न ।' उनीहरुले वाइसीएलका लागि लडाकुबाट एक हजारका दरले लडाकुको तलबबाट उठाएको रकम सार्वजनिक गर्न माग समेत गरेका थिए ।वाइसीएका माग पुरा गर्ने सम्बन्धमा माओवादीले स्थायी समिति सदस्य नेत्रबिक्रम चन्द र पोलिटव्युरो सदस्य जनार्दन शर्मालाई जिम्मा दिएको छ । दाहालले बैठकमा चन्द र शर्माले आर्थिक प्याकेज र अन्य मागबारे गृहकार्य गर्ने बताएका थिए ।

संविधानसभा निर्वाचन अघि माओवादीले करिब तीन हजार लडाकुलाई वाइसीएलमा तानेको थियो । आन्दोलनमा उत्रिएका वाइसीएलको प्रमुख माग स्वच्छिक अवकाशमा जाने लडाकु सरह आर्थिक प्याकेज दिनुपर्ने छ । उनीहरुलाई कम्तिमा पाूच लाखका दरले राहत दिने हो भने डेढ अर्ब रुपैया आवश्यक पर्ने छ । माओवादी उक्त रकम पार्टी कोषबाट उपलब्ध गराउने निर्णय स्थायी समिति बैठकले गरिसकेको छ ।

by;ekantipur.com