कस्तो हुने हो 'तुलसी' र 'रावण' को भिडन्त

 हिरोइन ऋचा घिमिरेले फिल्म 'तुलसी'को पोस्टर सार्वजनिक गरेको भोलिपल्ट अर्की हिरोइन रेखा थापाले 'रावण'को प्रोमो निकालेकी छिन्। ऋचाले मंगलबार आफ्नो २९ औं जन्मदिनमा पोस्टर रिलिज गरेकी थिइन्। रावणको पोस्टर यसअघि नै रिलिज भइसकेको छ।
दुवै फिल्मको रिलिज डेट पनि सँगैसँगै हुने सम्भावना छ। कमलकृष्णको निर्देशनमा बनेको 'रावण'लाई चैत २७ मा रिलिज गर्ने योजना रेखाको छ भने ऋचाले नयाँ वर्ष ताकेकी छिन्। 'तुलसी'को सुटिङ अगाडि गरिएको भए पनि रिलिजमा 'रावण'ले उछिनेको छ।

ऋचाको पोस्टरमा नयाँ हिरो विमलेश अधिकारी छाएका छन् भने रेखाको प्रोमोमा पनि नयाँ हिरो किशोर खतिवडालाई हाइलाइट गरिएको छ। 'तुलसी' र 'रावण' दुवैलाई नारीप्रधान फिल्म बताइएको छ। दुवैमा ऋचा र रेखा मुख्य भूमिकामा छन्।
ऋचा र रेखाले आफूलाई कट्टर प्रतिस्पर्धी मान्ने गरेको सहकर्मी फिल्मकर्मीहरु बताउँछन्। रेखाका पति छवि ओझा निर्माता हुन् भने ऋचाका पति शंकर घिमिरे निर्माता तथा निर्देशक। छोटो लुगा लगाउने मामिलामा रेखा र ऋचा एकअर्काभन्दा कम छैनन्।
रमाइलो संयोग, दुवैका घर पशुपतिपछाडिको गौरीघाट क्षेत्रमा छन्। ऋचाका अनुसार रेखासँग उनको उमेर पनि समान छ।
यसअघि रेखाद्वारा निर्मित फिल्म 'अन्दाज' र ऋचाले बनाएको 'ब्रेकफेल' पनि लगभग सँगसँगै रिलिज भएका थिए। त्यतिबेला पनि फिल्मको व्यापारमा रेखाले ऋचालाई जितेकी थिइन्। 'तुलसी' र 'रावण'मा चाहिँ को जित्नेछ? सायद नयाँ वर्षको चर्चा यही रहला।


by;nagariknews.com

Labels: नेपाली